Bagong Kasal

Bagong Kasal

Isinulat ni Lawrence R. Gonzales

February 27, 2011

Tayo ay nagpakasal

Pero ako ay nasakal

Sa luto mo parang bakal

Parang ako'y nagpatiwakal.

Ikaw ay nagluto ng sinaing

Pero ito'y naging uling.

Kahit ipakain sa kambing

Siguradong maduduling

Ako'y nagpaluto ng paborito

Masarap na ulam adobo

Iniwan mo naging tostado

Kaya yung kulay parang chonggo

Aking mahal huwag magalit

Yung luto mo diko nilalait

Ang pagkain natin laging mapait

Katibayan ba ito na ika'y galit.

Bakit noon masarap yung luto

Bakit ngayon tila naglaho

Nagbago ang pakikitungo

O bumibili ka lang ng luto.

Sa tuwing aakyat ng ligaw

May nakahandang masarap sa sabaw

Nakakapawi ng uhaw

Nainggit pati ang langaw.

Aking nalaman ang pinagmulan

Di inaasahang ito'y matuklasan

Sikreto ng pagkain na malinamnam

Inorder lang pala sa restaurant.

Kaya pala masarap ang pagkain

Mabilis karing maghain

Konti lang yung hinain

Masarap kainin.

Mahal kita walang iba

Kahit ulam natin tinapa

Ikaw parin sinta

Mahal kita, mula ulo hanggang paa.

 

Paalam Anak

Paalam Anak - Sweet Denice Gonzales

Isinulat ni Lawrence R. Gonzales

May pulong sa amin

Kasama kaibigan namin

Sa Gitna ng Kuwentuhan

Misis ko sumakit ang tiyan.

Hating gabi ako ay ginising 

Si Misis, sa sakit dumadaing

Sa bahay agad lumisan

Doktora agad tinawagan. 

Sa hospital ako'y nahimbing

Paggising ko mayroon na kaming supling

Pinatawag ako sa operating

Para sanggol ay aking silipin.

Ako'y nalungkot sa aking nakita

Maraming tao nakapaligid sa kanya

Ang anak ko na sanggol pa

Agad sa akin binawi na.

Habang ako'y lumalapit

Ang puso ko'y parang mapupunit

Parang ako'y hinahagupit

Ang dibdib ko sobrang sakit.

Aking anak gumising ka

Ang iyong ama narito na

Kahit konti umiyak ka

Gusto kong makita na buhay ka.

Maliit mong tinig

Nais kong marinig

Katawan mong malamig

Yayakapin ko ng mahigpit.

Habang ikaw ay aking yakap

Ang luha ko ay pumapatak

Parang ulan na bumabagsak

Napapasigaw ng malakas.

Kailangang tanggapin

Masakit man sa damdamin

Ang Diyos ay mabuti parin

Sapagkat siya ang iyong makakapiling.

Pamahiin, Halimbawa at Paliwanag

Ang pamahiin ay ang mga paniniwala ng mga matatanda na may relasyon sa mga ginagawa natin at nakikita natin, isang paniniwala na walang basehan kung ito ay totoo o hindi o nagkataon lamang. 

Higit na mabuti kung makikinig tayo sa mga pamahiin na may magagawang mabuti para sa atin upang tayo ay manatiling ligtas at malayo sa kapahamakan.

Mga Bugtong at Halimbawa

Ano ang Bugtong? 

sagot: Palaisipan, Pahulaan

Ang bugtong ay isa ring laro ng patalasan ng isip dahil kailangan mong hulaan ang sagot nito, puedeng laruin ng mga bata o matatanda habang kayo ay nagpapahinga o nag-uusap ng iyong mga kaibigan, kalaro at kapamilya. Ang larong palaisipan na tulad nito ay masayang laro at mayroon kang matutunan tulad ng mga bagay na hindi mo alam.  

                                  15. Isang Balong Malalim, punong puno ng patalim.

                                        Sagot: Bibig

                                  16. Kung araw ay buka, kung gabi ay sara.

                                        Sagot: Bintana

                                  17. Nagtago si Pedro, nakalabas ang ulo.

                                        Sagot: Pako

                                  18. Kabiyak na suman, magdamag kong binantayan.

                                        Sagot: Suman

                                  19. Bumili ako ng alipin, mataas pa sa akin.

                                        Sagot: Sumbrero

                                  20. Apat na magkakapatid, sabay sabay ng sumisid.

                                        Sagot: Tinidor

 

 

Tula ng Pasasalamat

Tula ng Pasasalamat

Isinulat ni: Lawrence R. Gonzales

February 8, 2011

Kapag puso'y tumugon

Isip ay babangon

At hindi maglalaon

Pintig ng puso'y tatalon.

Tangi kong dalangin

Sana tula ay palarin

Sana ay tangkilikin

Kahit minsan ay basahin.

Sana ay mapansin

Tulang may damdamin

May mabuting hangarin

Laman ng puso ay dinggin.

Mamaraming salamat sa pagbisita

Sa website kong pinaganda

Upang maging kahali-halina

Para sa taong mambabasa.

Maraming salamat sa comment ng lahat

Aking damdamin nailalahad

Sa maikling sulat na may pamagat

Tulad ng kuwento ng mga alamat.

Sa aking tula may nagpasalamat

Nakatulong maghilom kanilang sugat

Minsan nahimbing at ako'y nagulat

Nais ko palang maging manunulat.

 Isinulat ni: Lawrence R. Gonzales

Makatang Pinoy - February 8, 2011